Vorið er komið.

Þegar veiðimenn fara að raða sér á kantinn þar sem áður var Höepfnersbryggja er komið vor á Akureyri. Í kvöld var eiginlega fyrsta alvöru vorkvöldið hér og hvert sem litið var spókaði fólk sig í góða verðrinu. Þeir voru að fá-ann og fýllinn bjóst greinilega við bita því hann svamlaði um framan við veiðimennina.

Eiginlega er þetta breyting. Ég man ekki að það hafi verið vandamál að kasta öngli í sjó hér áður fyrr. Þá var það aðalega rita eða skeggla eins og hún er gjarnan kölluð hér í bæ, sem hélt sig nærri en það var ekki vandamál. Nú má maður hafa sig allan við að setja ekki öngul í nærgöngulan fýlinn. Hann kemur gjarnan á renniflugi meðfram bryggjunum og flækir sig í línum veiðimannanna.

 Það er ekkert sérstaklega skemmtilegt að losa hræddan fýl úr línu eða af öngli. Það kostar gjarnan lýsisspýtingar með tilheyrandi ófögnuði.