Haustdagar fyrir norðan.

Það hafa verið frábærir haustdagar við Eyjafjörð að undanförnu. Fínn hiti og sunnan andblær. Nú er sem dragi úr því um sinn og norðangarrinn minnir á sig. Þó fer hitinn lítið niður og varla kemur frost sem kallast getur enn sem komið er. Það er af sem áður var í æsku minni að oft var snjór og frost í október.

Myndin sem hér fylgir með er tekin frá Strandgötunni og til suðurs. Sólin roðar skýin yfir Vaðlaheiðinni, Garðsárdalnum og Staðarbyggðarfjöllunum. Brúin fína sem sett var þarna fyrir allmörgum árum sómir sér vel og minnir aðeins á gömlu dagana þegar fimm brýr voru yfir læki og kíla á Strandgötunni.

Sumir hafa látið sér detta í hug uppfyllingar framan við Strandgötuna til að vinna land og fá viðlegukanta. Mér er það ljóst að slíkar hugmyndir setja þeir einir fram sem ekki hafa mikin skilning á því hversu þessi ásýnd og karakter bæjarins er mikilvæg í augum þeirra sem til þekkja. Það verður langt þangað til Akureyringar láta það viðgangast að frekari uppfyllingar verði gerðar sunnan við Oddeyrina.

Athugasemdir

[Páll Jóhannesson, 15.10.2007 kl. 16:18]

En pældu samt í því minn kæri félagi hversu mikið ásýnd bæjarins hefur breyst? manstu hvernig strandlengjan var þegar við vorum pollar? svo setja menn fyrir sig hvort hús eru höfð 4 eða 8 hæðir af því að það má ekki breyta ásýnd bæjarins.

Annars er ég sammála þér hvað varðar landfyllingu hér í bæjarlandinu okkar, nú er nóg komið, hingað og ekki lengra.