Geitungarnir mættir

Það er varla að maður hafi séð nýja landneman okkar í sumar. Geitungar hafa varla sést. Ég held að ég hafi séð fimm stykki frá því í vor þar af einn sem leitaði fanga fyrir bú sitt hjá mér í svefnherberginu.

En nú brá svo við að geitungar voru á hverju blómi í Lystigarðinum í dag þannig að ekki er kynþáttur trjágeitunga útdauður á Akureyri. Menn eru að vísu mishrifnir af þessum fallegu flugum og er ánægja þeirra sem hafa fengið að kenna á stungum þeirra hvað minnst. Ég hef enn sem komið er ekki reynslu af slíku og sækist ekki eftir því.

Þessi ágæti geitungur sem hér er með í pistilinum var svo almennilegur að stitja fyrir hjá mér í dag og var friðsemdin uppmáluð.

Athugasemdir

[Magnús T, 12.8.2007 kl. 16:21]

Geitungar eru friðsælir og stinga ekki nema í sjálfsvörn. Hins vegar eru þeir forvitnir og óhræddir í návist fólks sem bregst oft við með því að slá á móti eða bregðast við með snöggum hreyfingum. Verst er að fá geitunginn upp í munninn með matnum, nokkuð sem gerist oft síðla sumars þegar geitungarnir verða kynþroska og þá samtímis vitlausir í sykur. Verst er hættan fyrir fólk sem er með ofnæmi. Í Svíþjóð deyja að jafnaði þrír menn á ári af völdum geitungastungu, nokkuð sem gerir geitunginn hættulegastan dýra í Svíþjóð. 

[Páll Jóhannesson, 12.8.2007 kl. 19:26]

BZZZZZZZZZZZ yndislegar skepnur thessir geitungar

[Karl Tómasson, 12.8.2007 kl. 23:20]

Falleg er myndin Jón.

Þeim fjölgar einnig hratt í Mosó þessa dagana.

Bestu kveðjur.