Frábær hátíð. Við skulum fagna

Hátíðin á Akureyri gengur fínt. Að vísu er veður með rysjóttara móti...norðan 10 - 15 metrar og slítur úr rigningu af og til. Hitastigið er um 8 gráður og ekki undarlegt að fólk hafi hugað að því að fara þangað sem betra veðri var spáð. Síldarævintýri á Sigló er fámennt og má þar um kenna því sama, veður er lítt til útilegu fallið hér norðan heiða.

Ég fletti af gamni aftur í tíman og skoðaði hádegiskort fyrir þennan dag þar til ég fann sambærilegan dag hvað veður varðaði. Ég fann loks dag sem var eins og þessi  í byrjun ágúst. Það var árið 1979 eða fyrir 28 árum síðan. Þá var hitastigið 1 gráðu lægra í hádeginu en í dag eða 7 gráður. Það er nokkuð sama hversu aðstandendur "Einnar með öllu" reyna að kenna bæjaryfirvöldum um að færra er en undanfarin ár,  að mínu viti er Kári veðurhamur valdameiri en vesalings bæjaryfirvöld hér í bæ.

Ég ætla að fagna aðeins þó svo Ruv hafi ekki séð ástæðu til þess. Í fyrra viðhafði Ruv afar neikvæðan málflutning vergna ástands sem þá var...mikil drykkja, ólæti og leiðindabragur á götum bæjarins. Núna voru þeir Ruv menn enn í neikvæða gírnum og gerðu mikið úr hversu fámennt væri og aðgangur að tjaldsvæðum var takmarkaður.

Af því svæðisfjölmiðillinn okkar er ekki í fagn-gírnum þá ætla ég að fagna aðeins.

 Ég fagna því að ekkert nauðgunarmál hefur komið upp. Ég fagna því að ekkert eiturlyfjamál hefur komið upp. Ég ætla að fagna því að engin árás hefur verið kærð. Ég ætla að fagna því að götur bæjarins eru ekki undirlagðar drukknu fólki. Ég ætla að fagna því að fjölskyldum hefur liðið vel á tjaldsvæðum bæjarins og þar hefur ríkt friður. Ég ætla að fagna því að hátíðarhöldin hafa gengið vel þrátt fyrir leiðindaveður.

Mér finnst þetta töluvert til að fagna og ég reikna með að bæjarfulltrúarinir allir, fagni með mér.

Meirihluti bæjarstjórnar gegn takmörkunum á tjaldsvæðum

Athugasemdir

[Gunnlaugur Halldór Halldórsson, 4.8.2007 kl. 21:00]

já það er bara hinn besta mál en skil ekki að hafa aldurtakmark á tjaldsvæðum ?

[Lindan, 4.8.2007 kl. 23:09]

Já fögnum því að það er ekki hræða í bænum.  Ég var á ráðhústorgi í dag þegar þessi mynd var tekin.  Verð að segja að sá sem tók myndina á hrós skilið fyrir að ná ÖLLUM sem voru í bænum á sömu myndina.  Spurning hvað keyra svo margir fullir í Vaglaskóg í nótt eftir ball þar sem má tjalda.