Hátindur sumars.

Það er hásumar þessa dagana hér fyrir norðan. Sólin skín og ég minnist þess ekki að hafa séð jafn mikið af hunangsflugum í kringum mig eins og núna að undanförnu. Nýji landneminn okkar, geitungurinn sést varla, ég held að ég hafi séð fimm stykki frá því í vor. Minna verður það varla. Til marks um fjörgugt líf á lóðinni minni hafa þrjár fjallaköngulær ákveðið að taka sér bólfestu á spennistöð Norðurorku sem staðstett er í lóðarhorninu hjá mér. (Samt er ég enn tillögulega normal enn held ég) Það er gaman að fylgjast með þessu köngulóm og vefvinnunni þeirra. Svo eru þær af ýmsum stærðum, sú stærsta sem er reyndar ótrúlega stór er lengst til hægri og virkar gráðugust og svo smækka þær til vinstri og sú sem er lengst í þá átt er eiginlega langrýrust. Ég er búinn að búa hér í 21 ár og hef aldrei séð þetta áður.

Þessi myndarlega hungangsfluga varð á vegi mínum í garðinum góða sem "konur gerðu frægan" forðum. Ég er búinn að koma í Lystigarðinn nokkrum sinnum í sumar og ég er alltaf jafn hissa á hversu fáa Akureyringa ég hitti þar. Stærstur hluti þeirra sem ég hitti eru erlendir ferðamenn og svo innlendir að hluta. En það má vel vera að þeir Akureyrsku séu á ferðinni þarna á öðrum tímum en ég.