Stríðið við skógarkerfilinn.

Það er mikil barátta hafin við skógarkerfil í Hrísey og á fleiri svæðum á Akureyri. Það er með ólíkindum hversu hratt þessi planta breiðist út og það sér stóran mun á frá ári til árs. Þessi planta er svo hávaxin og þétt að ekkert annað þrífst í sambýli við hana, í það minnsta ekki hinn lágvaxni og viðkvæmi gróður okkar hér á landi. Það er helst hvönnin sem nær að standa upp úr breiðunum þar sem þær eru þéttastar.

Svo er það í nágrannasveitarfélögum okkar sem kerfillinn virðist á feikna flugi. Í Eyjafjarðarsveit berst hún með vegi og um tún eins og logi um akur. Hún þekur þegar gríðarlega stór svæði í landi Kaupangs og þar suður frá. Í Hörgárbyggð virðist sem kerfillinn sé að ná sér á strik í Kræklingahlíð og að keyra veginn frá Syðsta Samtúni og suður að Ásláksstöðum er eins og að keyra í göngum svo hár og þéttur er gróðurinn orðinn meðfram veginum. Síðan berast fræin niður Lónið og þegar er kerfillinn farinn að breiðast út á landamærum friðlandsins í Krossanesborgum og bráðnauðsynlegt að stöðva að hann nái framrás inn í borgirnar með ófyrirsjáanlegum afleiðingum.

Ég sit í umhverfisnefnd bæjarins og drjúgur tími nefndarinnar hefur farið í vinnu og skipulagningu við að hefta útbreiðsluna í Hrísey þar sem vofir yfir stórkostlegt áfall fyrir viskerfi eyjarinnar ef ekkert verður að gert. Dæmi er bókun frá síðasta fundi.

6.          Hrísey - kerfill og aðrar óæskilegar plöntur í bæjarlandinu
2006080025
Verkefnastjóri umhverfismála fór yfir stöðu og árangur verkefnisins.
Umhverfisnefnd þakkar verkefnastjóra kynninguna og bíður eftir niðurstöðum áfangaskýrslu sem verður afhent í haust.

Þegar eru hafnar tilraunir og leit að aðferðum til að vinna gegn þessari þróun. Búið er að prófa heitt vatn, lífrænt eitur og plantan er slegin í miklum móð víða um eyjuna. Þegar er hafinn sláttur á ýmsum svæðum á Akureyri og nauðsynlegt að nágrannar okkar í suðri og norðri taki til hendi og leggi atlögu við þennan vágest. Slíkt er lífsnauðsyn ef ekki á illa að fara.