Engin hátíð, skammarlegt !

Á morgun er sjómannadagurinn. Hér á Akureyri hefur hann og laugardagurinn verið miklir hátíðisdagar. Róðurinn á laugardegi þar sem mikill fjöldi liða keppti, bæði land og sjómanna. Bátarnir Elding og Leiftur voru merkilegir í augum æskunnar á Akureyri og síðar bættust við fleiri. Sjómannaballið og hátíðahöldin sem seinni árin hafa verið við Sigöldu voru mikil skemmtan, sérstaklega fyrir ungdóminn.

En nú er þögn í bæ. Haft er fyrir satt að úlfúð og óeining milli stéttarfélags sjómanna og útgerðarmanna hafi smátt  og smátt leitt til algjörs trúnaðarbrests. Sagt er að nú tími stórfyrirtækin Brim og Samherji ekki lengur að styrkja hátíðahöld sjómanna og því er nú í fyrsta sinn í áratugi ekkert um að vera hér í þessum mikla útgerðarbæ. Það var víst síðast 1939 sem slíkt gerðist hér.

Mér sem Akureyringi finnst þetta mikil skömm og til lítils sóma.  Í gær heyrði ég að sjómönnum og fjölskyldum þeirra var boðið til Þórshafnar til þátttöku í hátíðarhöldum þar. Í flestum plássum á Íslandi er hátíðarhöld. Ég eiginlega skammast mín fyrir hönd Akureyringa. Það er eiginlega niðurllægjandi að horfa upp á það hugarfar sem ríkir hjá útgerðum hér í bæ. Þeir eru ef til vill of blankir eða vinalausir.

Þetta má ekki gerast aftur. Ég vil gjarnan að bæjarfélagið komi að þessu máli. Ef milljarðafyrirtækin tíma ekki eða vilja ekki taka þátt í að gleðja starfsmenn sína og aðra bæjarbúa þarf Akureyrarkaupstaður að koma að málum. Þetta vil ég ekki sjá að gerist aftur í þessum mikla útgerðarbæ.