Æ Æ Æ Bjarni !!

Aumingja Bjarni Benediktsson. Það var voðalegt að fylgjast með honum í Kastljósinu áðan. Stamandi og vandræðalegur reyndi hann að drepa ríkisborgararéttarmálinu á dreif. Þáttarstjórnandinn var samt ósköp mildur við hann og sleppti honum aftur og aftur af króknum. Það er eiginlega svolítið merkilegt að hlusta á þetta viðtal aftur. Meðan á því stóð vantaði ekki að bunan stóð fram úr Bjarna á milli þess sem hann stamaði og svitnaði.

Auðvitað er þetta hræðileg staða fyrir hann. Uppvís að því að skrökva, eða í það minnsta að hagræða sannleikanum gróflega. Hann vissi allan tímann að þetta var stúlka vensluð ráðherranum, annars hefði hann ekki verið að vinna vinnuna sína. Honum ber að þekkja aðstæður í hörgul, bakgrunn, aðstæður og ástæður og hvar viðkomandi á sér griðarstað hér. Hann tók þann pólinn að þykjast ekkert vita og svo eru staðreyndir málsins og skjöl sem segja allt annað. Það er ekki skrítið þó hann hafi stamað í Kastljósi í kvöld.

Ég held að Bjarni vilji vera heiðarlegur en "lendir" í fyrirgreiðslumáli þar sem maður þekkir mann og lætur hann svindla á kerfinu. Tíu dagar frá umsókn og að veitingu ríkisborgararréttar þar til allt er klárt og ástæður léttvægar.....hver heldur þú að trúi þér Bjarni minn ?

Staðreyndin er sú að þarna opinberast spilling og fyrirgreiðsla sem alls ekki á að eiga sér stað og það sem verra er að þetta fólk er búið að vera svo lengi við kjötkatlana að því finnst þetta bara í góðu lagi. Ég er hræddur um að fokið hefðu hausar værum við í pólitísku siðferðisumhverfi...en hér hafa Sjálfstæðismenn og Framsóknarmenn samið sín á milli um að þeir og þeirra fái bestu fyrirgreiðslu og meðferð en pöpullinn megi éta það sem úti frýs.

Áfram spilling - ekkert stopp.....nú er mál að linni.