Útmigin fjallkona. Óboðlegur sóðaskapur.

 

„Þetta er bara dá­lítið ógeðslegt ef ég á að vera hrein­skil­in,“ seg­ir Katrín Ósk Ásgeirs­dótt­ir hjá Jök­uls­ár­lóni ehf, en hún seg­ir ferðamenn á svæðinu gjarn­an sinna kalli nátt­úr­unn­ar víða um svæðið.

_________________

Eftir lýsingum að dæma er ástand í hreinlætismálum ferðamanna í hreinu rugli. Ísland er greinilega ekki í stakk búið að taka við 1,2 milljónum ferðamanna á ári.

Fjallkonan virðist útmigin og klósettpappír og fleira gleðja augað.

Það fer nú ekki framhjá þeim sem voga sér að heimsækja perlurnar okkar, þar eru ferðamenn eins og maurar um holt og hæðir, rútuflotar bíða á bílastæðunum og friður og ró horfin út í buskann.

Bak við steina og í lautum glittir í hvíta rassa ferðamanna sem ekki fundu salerni eða vildu ekki borga smáaura fyrir að gera þarfir sínar á réttum stöðum.

Í reynd er ástand í salernismálum fyrir ferðamenn í hreinum ólestri.

Í reynd ættu heilbrigðisyfirvöld að bregðast við og krefjast lágmarksaðstöðu á öllum viðurkenndum ferðamannastöðum.

Kamrar, plasthús eða móarnir eru ekki boðleg aðstaða og heimamenn vilja ekki ferðamennsku sem skilur eftir sig ferðamannaúrgang í öllum móum, kirkjugörðum og hvar sem skjól er að finna.

Manni bregður við, nýkominn frá að vera túristi í Austurríki þar sem allir ferðamannastaðir voru með fullkominni aðstöðu til þessara verka.

Það kostaði víða en það var bara í góðu lagi.

Hvergi sá ég hvítan rass bak við bensínstöð eða í kirkjugarði.

 

„Fríar hægðir betri en borgaðar“

Athugasemdir

[Guðleifur R Kristinsson, 17.7.2015 kl. 13:48]

heir heir

vel sannar og þarfar athugasemdir 

[Anna Dóra Gunnarsdóttir, 17.7.2015 kl. 15:36]

Víða erlendis þarf að borga fyrir aðgang að salernum, enda kostar það eitthvað að halda uppi boðlegri aðstöðu fyrir menn að skila afurðum búksins. Fyrir það er sjálfsagt að greiða og aðgangur að klósetti er ekki mikill, hafi ég lesið rétt. Tvöhundruð krónur eru lítill peningur frá hverjum og einum, en margt smátt gerir eitt stórt og þar með fáum við góða og þrifalega aðstöðu, pappír og næs. Ég vil frekar borga tvöhundruð krónur og kúka í geðslegt klósett, en að drekka kaffi fyrir fimmhudruðkall og fá köku með fyrir fimmtánhundruð auka.

[Magnús Sigurðsson, 17.7.2015 kl. 15:41]

Þú getur líka fengið að skíta á Íslandi gegn borgun Jón, þetta er bara spurning um að vera rétt staðsettur þegar kallið kemur.

Annars er þetta úrlausnarefni hins opinbera að stærstu leiti, ríkið er búið að moka inn skatttekjum vegna ferðamanna og í reynd ætti að sýna þeim þann höfðingsskap að fá að skíta frítt sem hafa bjargað Íslandi upp úr forinni.

Það væri nær að rukka þá duglega fyrir að skíta sem þiggja ofurlaun í skjóli ríkisins, svo faramarlega sem þeir skíta ekki heima hjá sér.

[Þorgils Hlynur Þorbergsson (IP-tala skráð) 17.7.2015 kl. 16:30]

Mikil umræða hefur skapast vegna ferðamanna, sem tappa af sjálfum sér eða ganga erinda sinna nánast þar sem þeim hentar, ekki síst í náttúruperlum landsins, heimamönnum og náttúruunnendum til mikils ama. Hvers vegna eru slíkir sóðar ekki hreinlega sektaðir fyrir slíkar framkvæmdir, til dæmis um 10.000 eða 20.000 krónur, umreiknaðar og námundaðar að erlendum gjaldmiðlum? Oft duga bannorðin ein og sér ekki til. Ef fólk er ekki sektað og fjármunir látnir tala í stað hjáróma radda á misgóðum erlendum málum brosir það bara og lætur orðin eins og vind um eyru þjóta. Ef ekki er sektað fyrir slíkar athafnir má nánast líta svo á að þeim sé þetta heimilað ellegar ráðlagt, þó svo að heilbrigð skynsemi eigi að sjálfsögðu að segja annað! Fremur ætti að hleypa ókeypis á salernin, til dæmis á Þingvöllum, að minnsta kosti á meðan þessi óáran ræður ríkjum. frown emoticon

[Arnór Baldvinsson, 17.7.2015 kl. 16:31]

Sæll Jón,

Mér sýnast þessi mál komin í fullkominn ólestur á Íslandi.  Hér í Bandaríkjunum eru yfirleitt svokölluð "rest stop" þar sem ferðamenn geta stoppað og gengið þarfa sinna, hvílt sig, rölt um og þess háttar.  Þessi stopp eru yfirleitt með heitu (ekki alltaf) og köldu vatni og salerni.  Svo eru tjaldstæði (camp sites) þar sem aðstaðan er oft fátæklegri og þar eru notaðir kamrar og rennandi vatn er yfirleitt eingöngu kalt vatn.  Ekkert að því að nota kamar ef svo ber undir.  Aðgangur að þessum salernum er ókeypis en maður þarf venjulega að borga fyrir tjaldstæði.  Hinsvegar eru svo hellingur af skyndibitastöðum sem eru opnir allan sólarhringinn og ferðamenn leita mikið þangað.  

Rusl og mannlegur úrgangur af ýmsu tagi er að verða vandamál allstaðar í heiminum.  T.d. hef ég lesið að það sé orðið vandræða ástand sumstaðar á leiðinni upp á Everest vegna rusls og drasls.  Jafnvel hafa lík verið skilin eftir og látin vera því enginn vildi taka á sig að koma þeim niður af fjallinu.  

Kveðja

[Snorri Hansson, 20.7.2015 kl. 15:51]

Ef maður borgar sig inn á t.d. Þingvelli, tjaldsvæði  o.s.frv.  þá er maður þar með búinn að borga fyrir snyrtiaðstöðuna. Ef maður ætlar að skoða eitthvað náttúrufyrirbrigði  erlendis, þá borgar maður sig inn fær bækling um staðinn og hefur aðgang að leiðsögumanni.  Auðvitað er snyrtiaðstaða til staðar.