Fótboltalandsliðið.

Ég ætlaði mér ekki að blogga um fótbolta. Ég fylgist með honum svona með öðru auganu og er alveg þokkalega meðvitaður um atburði. Eitt af því sem ekki hefur farið framhjá mér er stöðugt sig landsliðsins í knattspyrnu niður alþjóðlegan lista landsliða. Ég er ekki alveg viss um hvar við erum stödd í siginu um þessar mundir en líklega er það nærri sæti 100.

Af hverju er þetta svona ? Aldrei hafa verið fleiri Íslendingar í atvinnumennsku erlendis..ég veit ekki hversu margir en líklega eru það nokkur fullskipuð knattspyrnulið sem spila erlendis. En af hverju sígum við þá látlaust niður þennan lista. Ef allt væri með feldu ættum við að vera miklu ofar, svona ef miðað er við allan þann fjölda sem hefur knattspyrnu að atvinnu erlendis. Ekki hef ég neitt vit á til að greina vandan en kannski er hann eftirfarandi að hluta. Íslenskir fótboltamenn ná góðum árangri hér heima. Þeir komast í atvinnumennsku, gjarnan hjá liðum í Noregi og Svíþjóð og enn þokast þeir uppávið í getu sumir. Það leiðir til þess að þeir komast kannski til Englands og fá vinnu við að spila í fótboltanum þar, gjarnan þó ekki í úrvalsdeild. Þó hafa nokkir náð því. Svo eru einn og einn sem ná enn lengra og komast til stórklúbbanna.

Þegar svo er komið að leikmenn hafa komist þangað lengst sem geta þeirra leyfir hefjast vandræðin. Þeir eru komnir einu skrefi lengra en geta þeirra leyfir. Þá bíður þeirra það leiða hlutskipti að verma varamannabekki lon og don, detta úr alvöru leikæfingu og að lokum koðna þeir niður og fara heim.

Ég veit það ekki en hef þó grun um að allt of margir leikmenn íslenska landsliðsins í knattspyrnu séu svona bekkjamenn í liðum sínum. Það kemur auðvitað niður á landsliðinu og ekki von til að menn í takmarkaðri leikþjálfum standist toppmönnum snúning. Eiður er ef til vill sorglegasta dæmi um leikmann sem komin er í lið sem kannski á eftir að skemma hann stórkostlega sem leikmann. Hvað sem öðru líður, Eiður í Barcelona er ekki sami Eiður og spilaði með Chelsea. Líklega eru bekkseturnar farnar að há honum alvarlega sem leikmanni.

Eiður sat á bekknum í sigri Barcelona