Mikið fjör í skipulagsmálum á Akureyri.

Í gær flutti ég skýrslu Skipulagsnefndar Akureyrar í bæjarstjórninni. Skýrslan var ansi yfirgripsmikil því mjög margt er í pípunum á Akureyri á næstunni. Það má nefna Miðbæjarskipulagið þar sem deiliskipulagsgerð er að hefjast, málefni Akureyrarvallar þar sem skýrsla vinnuhóps með tillögum að framhaldi verður lögð fyrir bæjarráð á morgun. Fleira má nefna, áætlanir um þéttingu byggðar, framhald Naustahverfis, tengibrautir og margt fleira.

Ég hef mikinn áhuga á eflingu stígakerfis á Akureyri og til eru fínar tillögur um uppbyggingu þess. Því miður hefur uppbyggingin ekki verði með þeim hraða undanfarin ár sem æskilegt hefði verið. Þess vegna tók ég nokkur kafla undir að fjalla um áætlanir meirihlutans í þeim málum. Til gamans skeyti ég þeim hluta skýrslunnar inn hér fyrir neðan ef einhverjir deila áhuga mínum á þeim málum til fróðleiks og upplýsingar.

·         Haldið verður áfram að vinna eftir stígaskipulagi sem liggur fyrir. Við gerð stíga og gangstétta verður sérstaklega gætt að frágangi kantsteina og mishæða vegna umferðar hjólandi og hreyfihamlaðra. Helstu útivistarsvæði bæjarins verða tengd við byggðina með góðum göngu- og hjólreiðastígum.

Að mínu mati þarf að taka stígaskipulag það sem fyrir liggur til endurskoðunar. Mjög margt í því heldur gildi sínu en ég tel nauðsynlegt að einfalda og síðan forgangsraða þeim verkefnum sem fyrir liggja. Ný vegalög gefa þau fyrirheit að ríkið ætli að koma að stígagerð með sama hætti og reiðleiða og það gæti flýtt mjög þeirri uppbyggingu sem nauðsynleg er. Gott stígakerfi sem dregur úr notkun einkabílsins er ein besta fjárfesting sem sveitarfélag getur lagt í. Umræða um svifryk og mengun ætti að hvetja Akureyringa og bæjaryfirvöld til dáða í þessum málum. Tillaga að þessari endurskoðun mun koma fram fjótlega í nefndinni.

·         Umhverfi Glerár verður lagfært og gert aðlaðandi til útivistar með gerð göngustíga. Deiliskipulagstilaga um þetta verkefni hefur verið í vinnslu í nokkur ár. Gert er ráð fyrir fjárveitingu til þess að ljúka þessu deiliskipulagi. Mjög mikilvægt er að ganga í að ljúka frágangi við Glerá á næstu misserum og það verður að segjast eins og er að umgengni og ástand við ána neðanverða er okkur til vansa..