Sjálfstæðisflokkurinn og ríkisvæðing skulda.

Vilhjálmur Bjarnason, þingmaður Sjálfstæðisflokksins, segir að skuldaleiðrétting ríkisstjórnarinnar sé mjög sértæk aðgerð, en ekki almenn, eins og margir stjórnarliðar hafa haldið fram.

_________________ 

 Þetta er sannarlega rétt hjá Vilhjálmi, þeir eru nánast handvaldir,  sem eiga að fá eitthvað í þessu ferðalagi Framsóknarflokksins.

Þar með er þetta sértæk aðgerð en ekki almenn, stór hluti þeirra sem urðu fyrir svokölluðum forsendubresti fá ekki neitt en stjórnarflokkarnir hafa valið sér hóp sem á að leiðrétta eitthvað. Valinn hópur með verðtryggð fasteignalán, frekar þeir tekjuhærri og alls ekki þeir sem hafa fengið einhverjar úrbætur áður.

Það er mjög sértækt og undarlegt að reyna að halda því fram að þetta sé almenn aðgerð.

Sjálfstæðisþingmönnum, mörgum hverjum, líður afar illa með þetta eins og sjá má, enda er það ekki í anda Sjálfstæðisflokksins að ríkisvæða, hvorki skuldir né annað.

En þeir þurfa að kaupa sér völdin með eftirgjöf við Framsóknarflokkinn sem er í örvæntingu sinni að reyna að hreinsa upp eftir himinhá kosningaloforð með afar takmörkuðum árangri.

Þá liggur það væntanlega fyrir þar sem tveir af þremur Sjálfstæðismönnum í efnahags og viðskiptanefnd ætla ekki að styðja málið að þar er ekki meirihluti í nefndinni.

Fróðlegt verður að sjá viðbrögð Sjálfstæðismanna í heild sinni þegar málið kemur í þingsal. 

„Þetta er sértæk aðgerð“