Akureyri eignast sína Kárahnjúka ?

Auðvitað er það ekki þannig þegar bornar eru saman virkjanaframkvæmdir við Kárahnjúka og hugsanlegar virkjanaframkvæmdir á Glerárdal.  En meginhugsun og ef til vill niðurstaðan er sú sama. Stjórnmálamenn falla gjarnan fyrir flottum glærum og gróðatölum þeirra sem vilja virkja en hugleiða aldrei þann fórnarkostnað sem felst í virkjun straumvatna og eyðileggingu náttúruvætta.Ef til vill er þetta ósköp mannlegt því stjórnmálamenn lifa fyrir núið og sjá sjaldan legra en næsta kjörtímabil leyfir enda liggja hagsmunir þeirra á því svæði. Það er mjög mannlegt að kaupa rök þeirra sem vilja virkja því þeirra tillögur byggja á vandlega gerðum fjárhagsáætlunum þar sem náttúran er, að vísu, aldrei með í útreikningum. 

En er Glerárdalur – Glerárgil einhvers virði til lengri tíma ?  Það sem eyðilegst við virkjun Glerár er það sem býr til Glerárgil  er náttúrvætti á náttúruminjaskrá. Við virkjun árinnar verður gilið og þar af leiðandi fossarnir og skessukatlarnir að mestu vatnslausir meginhluta ársins.  Hversu mikils virði er það fyrir ferðamennsku til framtíðar að sýna ferðamönnum vatnslausan Dettifoss eða Gullfoss svo ýkt dæmi séu tekin ? Að sjálfsögðu einskis virði.  

Á sama hátt verður Glerárgil einskis virði sem náttúruvætti eða ferðamannastaður þegar vatnið er horfið og þar með verða fossarnir og skessukatlarnir vatnslausir nema smá tíma á sumrin. Aðra hluta árins verður aðeins lítill bæjarlækur í fossum og giljum. Þetta er sú hugleiðing sem stjórnmálamenn á Akureyri verða að taka með opnum og gagnrýnum huga. Akureyri er ferðamannabær. Akureyri á marga vannýtta möguleika í ferðamennsku og þar skorar Glerárgil, Glerárfossar og skessukatlar hátt. Vantslaust gil er ekki söluvara á ferðamannamarkaði heldur minnisvarði um skammsýna hugsun stjórnmálamanna. Ég geri líka ráð fyrir að umhverfisráðuneyti og umhverfisstofnun hafi á því skoðun þegar svona er gert. Það er ekki út í bláinn að Glerárgil er á náttúruminjaskrá. 

Þarna kemur samlíkingin við Kárahnjúka. Þar sitja heimamenn á Héraði með ónýtt lífríki og umhverfisslys í stórum skala. Það skrifast á stjórnmálamenn alfarið og eingöngu. Á sama hátt gæti Akureyri tapað sinni merkilegustu perlu í náttúru bæjarins því virkjun og vatnslausir fossar og skessukatlar eru ekki söluvara til framtíðar. Allt í minni skala en fullkomlega sambærilegt að öðru leiti. Ég vil treysta stjórnmálamönnum á Akureyri til að komast að skynsamlegri niðurstöðu að vandlega athuguðu máli þar sem öll lóðin eru sett á vog framtíðarinnar en ekki eingöngu aurar í vasa næstu árin.

 Ég skora á þá að kynna sér svæðið því það læðist að mér sá grunur að margir hafi ekki hugmynd um Glerárgil, Glerárfossa og alla þá dýrð sem gilið býður uppá. 

Jón Ingi Cæsarsson áhugamaður um Glerá og útivistarparadís á Glerárdal.

             

Athugasemdir

[Guðjón Sigþór Jensson, 21.3.2013 kl. 07:11]

Flottar myndir!

Vonandi tekst að forða Glerá frá virkjanaáformum. Þetta verður aldrei annað en smávirkjun sem skiptir engu máli en hefur mikið rask í för með sér.

Við sitjum uppi með gamla virkjun, Andakílsárvirkjun, sem valdið hefur mikillri röskun á lífríki Skorradalsvatns. Lífríkið allt í rugli. Ekkert þokast til að koma jafnvægi þar að nýju.

Vítin eru því mörg og betur væri að hlusta ekki á gjálfur þeirra stjórnmálamanna sem vilja fórna meiru.