Sögulegt tækifæri Alþingis til álitsauka.

Forsætisráðherra lagði áherslu á að helmingur kosningabærra manna hafa tekið þátt í þjóðaratkvæðinu og að skilaboð þjóðarinnar væru skýr. Klára yrði málið með sóma á Alþingi og að trúverðugleiki þingsins væri í húfi í þeim efnum. Þá sagði Jóhanna ennfremur að þjóðinni hefði þar með tekist það sem Alþingi hefði mistekist sem væri heildarendurskoðun stjórnarskrárinnar.

____________________

Það er góðfúsleg beiðni til þingmanna á Íslandi að þeir virði niðurstöður í kosningu þjóðarinnar.

Nú hafa þeir sögulegt tækifæri til að auka á virðingu þingsins með að falla ekki í skotgrafir upphrópana og flokkadrátta.

Þjóðin hefur talað, og skilaboðin eru skýr.

Vinnið vinnuna ykkar í samræmi við þjóðarvilja og látið af skítkasti og langsóttum skýringum á þessari eindregnu niðurstöðu.

Þá gæti vel verið að álit þingmanna og þingsins rísi úr pilsnertölum í eðlilega stöðu sem ætlast verður til að þingmenn og Alþingi rísi undir.

Nú er tækifærið að auka álit á þingi og þingmönnum, ef vilji er til þess hjá liðinu á þingi.

Flokkadrættir og klækir víki

Athugasemdir

[hilmar jónsson, 23.10.2012 kl. 15:34]

Sammála.

[Júlíus Guðni (IP-tala skráð) 23.10.2012 kl. 15:44]

Ég ber meiri virðingu fyrir alþingismönnum sem fylgja sannfæringu sinni og eru samkvæmir sjálfum sér en hinum sem láta af skoðunum sínum eingöngu eftir því sem landið liggur hverju sinni. Að sjálfsögðu verða þingmenn að virða niðurstöðurnar en í því felst ekki síður að taka tillit til þess hluta þjóðarinnar sem ekki vildi leggja tillögurnar til grundvallar að nýrri stjórnarskrá.

Það að Alþingi njóti ekki trausts hjá þjóðinni er ekki vegna þess að þingmenn séu ósammála og standi á skoðunum sínum heldur vegna þess að fólk verður áþreifanlega vart við það að ekki er verið að taka á hinum raunverulegu vandamálum sem brenna á fólki dagsdaglega. Þegar Alþingi nær að taka á þeim með virkum hætti mun virðing þess aukast.

[Einar Þór Strand, 23.10.2012 kl. 15:57]

Að virða niðursöðu 33% og nauðga hinum 67% voðalega minnir þetta mig á Hitler og Göbbels.

[hilmar jónsson, 23.10.2012 kl. 15:59]

Ef þú nennir ekki að mæta á kjörstað Einar, upplifirðu það þá sem nauðgun ???

[Einar Þór Strand, 23.10.2012 kl. 16:26]

Það er þannig að í þjóðaratkvæðum verða að vera girðingar sem tryggja það að minnihluti geti ekki tekið völdin og það verður best gert með því að yfir 50% þeirra sem eru að kjörskrá verða að vera samþykkir breytingu annars er hætta á því að hægt verði að níðast á hópum í samfélaginu.  Reyndar verður að vera þannig regla að ekki sé hægt að setja lög með beinu lýðræði nema að þingið (sem á að vernda minnihlutann, því það er jú þannig að við verðum að vernda einstklinga fyrir skrílnum, okkur sjálfum) og þjóðin séu samstíga.

 Það sem ég sé að þeim tillögum sem stjórnlagaráð kom með er það sem ekki er þar, til dæmis krafa um að það sé meirihluti þingmanna á bakvið lög ekki niður í 17 eins og hefur gerst.

Enn það er eitt í tillögum stjórnlagaráðs sem verður að fara út og það er að ekki sé hægt að krefjast þjóðaratkvæðis um þjóðréttarlegmál, því þá verður ekkert sem skiptir máli sem kemur til þjóðaratkvæðis.

Hilmar já ég upplifi það sem nauðgun ef 33% geta sett lög á alla því það er og verður alltaf minnihluti, og athugaðu það að þú verður kannski ekki alltaf sjálfur í 33% heldur á móti.  Ég hef í yfir áratug haft og gert athugasemdir við það að á Alþingi séu sett lög sem ekki njóta stuðnings meirihluta á þingi (32 þingmenn) og ég hef líka viljað að auðir seðlar í kosningum geti skilað auðum sætum inn á þing án þess að það fækki þeim sem verða að vera á bakvið samþykktir þingsins, sem ég vill reyndar fara með upp í 2/3 eða 42 þingsæti til þess að minnka alræði meirihlutans en það er svo annað mál.

[Jón Ingi Cæsarsson, 23.10.2012 kl. 16:50]

15-25% kjósenda fara sjaldan eða aldrei á kjörstað. Alþingskosningar eru að skila 80% þegar best lætur, sveitarstjórnarkosningar heldur lægri víðast hvar.  Man ekki til þess að áhrifaleysi þeirra hafi verið skilgreint sérstaklega fram að þessu.

Að skila auðu er afstaða, að mæta ekki á kjörstað getur verið hvað sem er...leti, áhugaleysi, mótmæli, þynka, gleymni, farvist og ýmislegt annað....  það er kátbroslegt að sjá suma hér reyna að gera eitthvað annað úr því og eitthvað eitt sérstakt.

[Einar Þór Strand, 23.10.2012 kl. 17:02]

Jón Ingi það er eitt að kjósa fulltrúa annað þegar verið er að kjósa um lög.  Reyndar fyndist mér ekkert að því að þeir sem ekki mættu á kjörstað myndu vera taldir sem auðir og skila auðum þingsætum á Alþingi.  Það gæti orðið mjög áhugavert sérstaklega ef við höfum regluna um 32 eða 42 þingmenn á bakvið lög.  Þá held ég að stjórnmálamennirnir yrðu heldur betur að fara að vinna eins og menn.