Frábært að fá lifandi hús.. en !

Atvinnustarfsemi er hafin í friðuðu húsi við Hafnarstræti 98 á Akureyri sem byggt var árið 1923 og gekk á sínum tíma undir nafninu Hótel Akureyri. Húsið mun hér eftir þjóna sínum upphaflega tilgangi en fyrirtækið Akureyri Backpackers mun reka þar gistingu og veitingasölu. Endurgerð hússins hefur staðið yfir frá miðju síðasta ári í samstarfi við húsafriðunarefnd en húsið er að stórum hluta til í eigu KEA.

_____________________

Frábært að Hafnarstræti 98 er ekki lengur mannlaus hjallur, hættulegur umhverfi sínu.

En það er leiðinlegt að vera ekki glaður alla leið.

Mér finnast eigendur hafa gefið sjálfum sér mikinn afslátt af uppgerð hússins og skrítið að Húsafriðunarnefnd hafi kvittað upp á þær breytingar sem festar eru í sessi. Húsið var útlitsfriðað og átti að fá sitt upprunalega útlit.

En því fer víðsfjarri og í reynd eru festar í sessi seinni tíma breytingar, t.d. blikkið beyglað og ryðgað málað með grænni málningu, seinni tíma gluggasetning látin halda sér, m.a. verslunargluggar á neðstu hæð sem eru seinni tíma breyting og að lokum er þakgerð breytt.

Verð að viðurkenna að vonbrigðin eru mikil, ef til vill af því maður hafði væntingar umfram það hægt var að búast við.

Starfsemi hafin í Hafnarstræti 98