Hver er að plata hvern ?

Áætlað er að undirbúningsframkvæmdir við uppbyggingu ferðaþjónustu á Grímsstöðum á Fjöllum, svo sem hönnun og skipulagning, geti hafist á þessu ári.

__________________

Hver er að plata hvern í þessu máli ?.. á því get ég ekki áttað mig.

Ég hef ekki nokkurt vit á rekstri en í mínum huga getur milljarða fjárfesting á þessum stað aldrei skilað nokkum arði miðað við venjulegar aðstæður.

Á Fjöllum er ekki ferðamannaveður og aðstæður 6 mánuði á ári. Allir sem eru eldri en tvævetur vita að engir ferðamenn sækja Mývatn heim svo heitið getur yfir vetrarmánuðina, þannig verður það á Grímsstöðum, þangað kemur enginn ótilneyddur nema um hásumarið.

Talað er um golfvelli, útvist, sundlaugar og fleira og fleira. Í góðu ári grænkar á Fjöllum í mai og sölnar í ágúst. Á fjöllum er marflöt háslétta í 400-500 metra hæð, sama hæð og meirihluti Vaðlaheiðar liggur í og sömu hæð og Skíðastaðir í Hlíðarfjalli.  Á Grímsstöðum er enn minni úrkoma og enn fátæklegri gróður. Veður eru hörð og logn sjaldgæft.

Meiri hluta árs eru hálendisleiðir sem liggja nærri Fjöllum lokaðar og engri umferð fær nema ef til vill vélsleðum þegar snjóalög verða þokkaleg eftir áramótin.

Það er sama hvernig ég hugsa um þetta mál... alltaf verður mér efst í huga. " Hver er að plata hvern? "

Skilgreining á landi Grímsstaða verður líklega, harðbýl hásléttueyðimörk með fátæklegum gróðri og litlum möguleikum., en sumir sjá eitthvað annað.

Hefja hönnun og skipulagningu í ár

Athugasemdir

[Guðlaugur (IP-tala skráð) 8.5.2012 kl. 08:57]

Jæja þá eru blessaðir Grímsstaðirnir komnir á kortið aftur. Á þeim vill kínverskur auðmaður byggja hótel. Ef hann vill byggja hótel golfvöll, eða hvað annað þá er það hans mál. Ef hann vill vera í 500 metra hæð í roki, slyddu og hafa gott veður þrjá mánuði á ári þá það. Okkur kemur það ekki við hvort að fjárfesting mannsins skili honum arði eða ekki. Það sem okkur kemur við er hverjir fá þarna vinnu og til þess að það verði íslendingar þá útbúum við laga rammann þannig að hann haldi. Okkur kemur við hvort það verði íslenskir iðnaðarmenn sem fái vinnu við að byggja þennan stað upp. Það eru ekki nema nokkur ár síðan að á þetta sama svæði þustu kínverskir verkamenn sem voru beittir harðræði og fengu verri aðbúnað en íslenskir. Við eigum að koma í veg fyrir að slíkt endurtaki sig. Um það snýst þetta heila mál. Það er ekki um það hvaða álit við höfum á þeim sem ætlar sér að byggja þarna upp. Það þeirra sem hafa til þess völd að veita ekki undanþágur til handa fyrirtæki sem þessu fyrir innflutningi á ódýrara vinnuafli. Það þeirra að sjá til þess að þetta fyrirtæki sé ekki að hrifsa til sín viðskipti með ólögmætum hætti. Það er þeirra að sjá til þess að þarna sé rekið fyrirtæki á eðlilegum samkeppnisforsendum. Ef að þetta er gert þá þurfum við ekki vað vera í þessum skot grafarhernaði. Horfum jákvætt á þessa framkvæmd nýtum hana svæðinu til góðs, hættum að tala svona verkefni niður, sjáum hver tækifærin eru.

Ég hef sagt það áður að því miður virðast stjórnvöld frekar hallast að því að banna frekar en að leggja þá vinnu á sig sem þarf til að hlutirnir geti verið í lagi. Ég á alveg eins von á að það gerist aftur. Nýlegt dæmi um þetta er við heimsókn kínversks ráðamanns á dögunum. Þá var hlaupið upp til handa og fóta svo að kínverskir fjölmiðlamenn ættu forgang að þessum gesti. Er það virkilega svona sem við viljum vinna? Vera með svona undirlægju hátt?

Með von um að þetta verkefni verði öllum til sóma með réttum lagaramma, kveð ég að sinni. Gs

[Kristján B Kristinsson (IP-tala skráð) 8.5.2012 kl. 09:11]

þetta er hárrétt umhverfislýsing á Grímsstöðum Jón Ingi, og allir þeir sem til þekkja eiga jafn erfitt með og þú að koma auga á að þarna geti verið ferðamannastaður, það eru 3 sæmilegir mánuðir þarna á ári júní,júlí og ágúst.

[Kristján B Kristinsson (IP-tala skráð) 8.5.2012 kl. 09:17]

Það er sérkennilegt að ekkert heyrist í umhverfisverndarfólki um þessa hugmynd.