Svæðisskipulag Eyjafjarðar. Skipulagsnefnd Akureyrar á villigötum.

Í fundargerð skipulagsnefndar er sérkennileg og óskynsamleg bókun. Bókun þessi byggir greinilega á miklu þekkingarleysi og mikilli vanvirðu í garð sveitarfélaganna í Eyjafirði.Þessi bókun er um Svæðisskipulag Eyjafjarðar sem hefur verið í smíðum frá grunni nokkuð lengi. Þegar komið var að kosningum 2010 var vinnan langt komin og orðin nokkuð góð sátt milli sveitarfélaganna um niðurstöður.

Síðan þá hefur lítið gerst og tveimur árum seinna er þessar vinnu enn ekki lokið og ekki átta ég mig á því hvaða sleifarlag hefur valdið því. Fyrir nokkru hófst síðan vinna við að ljúka þessu verkefni og í ofangreindri bókun frá því á miðvikudaginn 25. apríl má lesa eftirfarandi.

Skipulagsnefnd telur nauðsynlegt að kafli um sorpmál verði endurskoðaður og að í lýsingunni komi fram stefna um hvernig sorpmálum verði háttað á svæðinu til lengri tíma litið og að gerðar verði tillögur um urðunarstað og meðhöndlun úrgangs í svæðisskipulaginu.  Hér rekur mig í rogastans. Það hafði tekist víðtæk sátt um meðhöndlun úrgangs á Eyjafjarðarsvæðinu. Jarðgerð, endurvinnsla, flokkun og um urðunarhluta var gert samkomulag við Húnvetninga sem voru búnir að koma á laggirnar nútíma urðunarstað.

Undirritaður kom fyrst að leit að urðunarstað 1998 þá fulltrúi í Sorpsamlagi Eyjarfjarðar. Árin þar á eftir voru gerðar ítrekaðar tilraunir til að finna urðunarstað á Eyjafjarðarsvæðinu. Allar tillögur sem fram komu voru skotnar niður og engin sátt var sjáanleg. Það var því gleðilegt þegar þessi mál voru leyst á síðasta kjörtímabili.  Nú virðist sem skipulagsnefnd Akureyrar sé tilbúin að hefja deilur við nágrannasveitarfélögin um þessi mál algjörlega að ástæðulausu. Samvæmt þessu er nefndin að leggja til að leitað verði í einhverjum nágrannasveitarfélaganna að urðunarstað fyrir úrgang Akureyringa. Megnið að því sem urðað er kemur frá Akureyri, að sjálfsögðu.  Að mínu viti er hér fullreynt. Það verður aldrei nein sátt um urðunarstað á Eyjafjarðarsvæðinu. Það þýðir að samþykkt Svæðisskipulags Eyjafarðar dregst og það verður aldrei samþykkt með þessum skilmálum Skipulagsnefndar Akureyrar. 

 Það er mjög miður að sjá að bæjaryfirvöld á Akureyri skuli ekki hafa meiri skilning og þekkingu á þessum málum. Við sem höfum starfað í þessum málaflokki lengi vitum að með því að setja þetta inn í greinargerð í Svæðisskipulagi hleypir málum í strand og efnt til óvinafagnaðar við nágrannasveitarfélögin. 

 

 

Það er ótrúlegt að sjá svona afturhvarf til fortíðar hjá bæjaryfirvöldum á Akureyri. Vonandi hefur bæjarstjórn vit fyrir skipulagsnefnd og tekur út þessa fráleitu kröfu um urðunarstað í Svæðisskipulagi Eyjafjarðar.

_____ 

( Birtist í Akureyri vikublað 3. maí 2012 )