Er vandamálið komið niður í bæ ?

 

Það er eitthvað að á flokkunarstöð Gámaþjónustunnar við Rángárvelli. Fugl virðist komast í æti á svæðinu því hann bíður í flokkum á hálfunninni moldarmöninni sem umlykur svæðið að hluta. Fuglagerið á öskuhaugunum var til skammar á sínum tíma og við lokun hauganna og nútímalegri nálgun hélt maður í einfeldni sinni að þetta vandamál væri úr sögunni.

 

En svo er nú aldeilis ekki og því miður er flokkunarsvæðið draslaralegt, hálfkarað og svo kemst fuglinn greinilega í æti. Það er algjörlega óviðunandi að svona sjáist á Akureyri og allra síst rétt við þéttbýlið enda vita allir hvað fugl sem kemst í sorp ber með sér og að er ekki langt í Giljahverfið frá þessum stað auk þess sem gróðurreiturinn Liljulundur með sumarhúsi er örskammt frá.

Ég trúi því staðfastlega að bæjaryfirvöld þá sérstaklega Framkvæmdaráð hysji nú upp um sig buxurnar og geri fyrirtækinu að koma þessum málum í lag.... á það skortir mikið eins og sjá má ef fólk fer og skoðar sig um á svæðinu. Formaður umhverfisnefndar mætti líka kveikja á perunni því þetta fellur sannarlega undir verksvið þeirrar nefndar að sjá til þess að svona sé í lagi.