L - listinn stefnulaus í skipulagsmálum.

 

   Frá því L-listi fólksins tók við stjórn bæjarins hefur margt breyst. Stefnufesta og framtíðarsýn í skipulagsmálum lögð til hliðar og í stað þess sjá bæjarbúar vingulshátt og stefnuleysi hvert sem litið er. Eitt fyrsta verk þessa undarlega stjórnmálaafls var að ákveða að endurskoða ekki aðalskipulagið á kjörtímabilinu. Ótrúlegur gjörningur og lýsir takmarkaðri framtíðasýn og staðfestir stefnuleysið.

   Undirritaður var formaður skipulagsnefndar á síðasta kjörtímabili. Skipulagsmál eru erfiður málaflokkur og krefst þess af þeim sem um þau fjalla hafi víðsýni og skilning á málaflokknum og hafi auk þess hugrekki til að taka erfiðar ákvarðanir og höggva á hnúta. Það hefur núverandi skipulagsnefnd alls ekki og úrræðaleysi og verkleysi nefndarinnar sýnir okkur svart á hvítu að undir stjórn L-listans mun ekkert gerast í þessum málaflokki nema með vandræðagangi og til skamms tíma. Það er afar slæmt og á eftir að koma Akureyri í koll.    Vandræðagangur Oddsmanna varðandi reitinn Hólabrautarreit er dæmigert fyrir vinnubrögðin. Undirritaður hafði mikið velt fyrir sér þessu svæði og ýmislegt komið til greina. Í mínum huga kemur alls ekki til greina að sameina þarna margar lóðir og beina gríðarlegri umferð inn á þetta svæði um ókomna framtíð, Þetta er íbúðasvæði með þröngum götum og litlum lóðum. Allir þekkja vandræðin sem eru þarna nú þegar. Svona starfssemi þarf að víkja og fara á svæði sem þolir slíka umferð og umfang.

Þetta sér L-listinn ekki og er að reyna að sigla milli skers og báru og þóknast öllum.   Sorgarsagan af heildstæða miðbæjarskipulaginu sem unnið var í framhaldi að íbúaþingi er kunn. Sú vinna hefur verið sett á ís og þróun þess skipulags  stöðvuð. Í því mun líklega lítið gerast meðan L-listinn ræður för.    Stefna, eða frekar stefnuleysi L-listans í skipulagsmálum hefur verið kölluð bútasaumur.

 Það er að mínu mati rétt og mér þykir líklegt að hugleysi þeirra og stefnuleysi muni valda vandræðum fyrir Akureyri til framtíðar. Næstu þrjú ár verða líklega samfeldur vandræðagangur og úrræðaleysi sem er sorglegt fyrir Akureyringa. Staðan er einfaldlega sú að þeir ráða ekki við málaflokkinn vegna þess að engin stefna liggur fyrir og þröngsýni er vondur fylgifiskur í þeim flókna málaflokki sem skipulagsmálin eru.   

 

 

   Jón Ingi Cæsarsson  fv.formaður skipulagsnefndar.

 

Athugasemdir

[Ágúst J. (IP-tala skráð) 14.5.2011 kl. 18:30]

Er þetta ekki Sómatúns - aðferðin sem þú lýsir hér ?