Hvað eru menn að hugsa ?

  Fallorka heitir félag í eigu Akureyrarbæjar. Þetta fyrirtæki hefur það hlutverk að halda utan um orkumál og rekur eina virkjun sem eitthvað kveður að og er sú í Eyjafjarðarsveit. Einnig er gömul virkjun neðarlega í Glerá á þeirra vegum eða Norðurorku sem er eigandi Fallorku svona pró forma.   

 

 

Nú hefur þetta félag, Fallorka, í annað sinn lagt fram hugmyndir til bæjarráðs um virkjun Glerár í hinu mikla og fagra glúfri neðst í Glerárdal. Þeir höfðu áður lagt fram sömu hugmyndir semma árs 2010 og var þeim afdráttarlaus hafnað af bæjaryfirvöldum, þ.e. bæði umhverfisnefnd og skipulagsnefnd. Og af hverju er þessum hugmyndum hafnað ?  Glerárgil og Gleráin njóta sérstakar verndar á þessu svæði samkvæmt aðalskipulagi.

   4.18.2 Svæði á náttúruminjaskráGlerárgil, Akureyri, Glæsibæjarhreppi [nú Hörgárbyggð], Eyjafjarðarsýslu. (1) Árgil Glerár fráBandagerðisbrú við Sólvelli, upp gilið að ármótum Glerár og Hlífár. (2) Gróðurríkt gil, skógarlundir,fjölbreyttar árrofsmyndanir, fossar, skessukatlar og skútar. Söguminjar.  Eins og allir vita hefur þessu svæði verið misþyrmt áratugum saman með efnistöku og sorpurðun. Nú sér fyrir endan á því og á undanförnum árum hefur verið unnið markvist að endurheimt landgæða á þessum slóðum og nú síðast var sorphaugunum lokað. Uppgræðsla efnistökusvæðanna er hafin og innan fárra ára verður þarna perla Akureyrar...þar sem mannlíf og útvist blómstrar bænum til sóma. Íbúum og gestum til gleði og yndisauka.   

 

 

 Þröngsýnar og skammsýnar hugmyndir Fallorku eru eins og reiðarslag fyrir uppbyggingu þessa svæðis. Það væri Akureyri til skammar og háðungar að aflétta friðun þessa mikla árglúfurs og hefta Glerána í röri til framleiðslu á lítilsháttar rafmagni. Fallorka reiknar út að þessi framkvæmd sé hagstæð og þá útkomu fá þeir með að verðleggja ekki þau náttúruspjöll sem slík framkvæmd hefði í för með sér. Ábyrðarlaus málflutningur og minnir á rök virkjanasinna fyrir á árum þegar náttúran var einskis metin. Ég hélt satt að segja að þeir tímar væru liðnir.    Vonandi ber okkur Akureyringum gæfa til að sjá lengra fram í tímann en stjórnendum Fallorku sem reikna sér gróða á  kostnað barnanna og barnabarnabarna okkar. Glerárdalur er í deiliskipulagingu og þar sjá menn fyrir sér framtíðar fólkvang Akureyrar. Glerá og Glerárgljúfur er hluti af þeim framtíðarfólkvangi og það má ekki gerast að skammtímagróðasjónarmið virkjanasinna eyðileggi þennan framtíðarmöguleika Akureyrar í útvistar og ferðamálum.