Skemmdarverk hestamanns í Krossanesborgum.

 

 

 

 Unnið hefur verið að stígagerð í friðlandinu í Krossanesborgum. Í sumar var lagður nýr stígur í samræmi við uppbyggingaráætlun stíga þarna og tengir hann austurhluta borganna við vestursvæðin og liggur síðan til norðurs eftir gamla þjóðvegarstæðinu sem lagt var af 1907.

Í dag gekk ég borgirnar eins og ég geri oft að sumri og ekki ósjaldan hefur maður haft áhyggjur af umgengi og virðingarleysi sumra sem þarna fara um.

En í dag fannst mér keyra um þverbak og þetta er eitt það ljótasta sem ég hef séð þarna. Nýji stígurinn var sundurkrassaður og stórskemmdur eftir hestamann eða hestamenn, sem hafa sýnt það dæmalausa virðingarleysi að ríða nýlagðan stíginn. Víða eru djúpar holur og stígurinn varasamur á köflum því þetta eru það miklar skemmdir að hætta er á að misstíga sig illa í mestu gryfjunum.

 

Það er sorglegt að horfa upp á slíkt virðingarleysi fyrir náttúrunni og friðlandinu. Auðvitað eiga menn að vita þetta en ef til vill þarf að girða friðlandið með afgerandi hætti og merkja miklu betur.

Lausaganga hunda er vandamál þarna líka og hundaeigendur sumir víla ekki fyrir sér að sleppa hundum sínum lausum þarna þó það sé stranglega bannað í þessu viðkvæma griðlandi fugla.

Í dag sá ég nokkra plastpoka með hundaskít þar sem eigendur hafa hirt skilvíslega upp eftir hunda sína en skildu síðan pokana eftir... ótrúlega dómgreindarlaust því plastpokalaus hundaskítur er skárri en innpakkaður ef hundaeigendur hafa ekki dug til að taka með sér...en annars er hundar bannaðir þarna.

 

 

  Það vantar ekki að hundaskítnum er pakkað inn í huggulega og litríka plastpoka.

Ég næ ekki þessu dómgreindarleysi og því miður voru plastpokar með hundaskít víðar og ég átta mig ekki á hvað fólki gengur til.

Ég held að flestir viti að ekki er dagleg hreinsun í friðlandinu og skora á fólk að hugsa áður en það framkvæmir svona vitleysu.

Athugasemdir

[Arnór Bliki Hallmundsson, 6.9.2010 kl. 00:16]

Agalega leiðinlegt þegar svona er gengið um með sóðaskap og skemmdarverkum á svæðum sem mikið hefur verið lagt í að gera aðlaðandi og skemmtileg.