Naustaborgir - vel varðveitt leyndarmál ?

 

 Gönguferð um Naustaborgir er einn af þeim frábæru valkostum sem Akureyringar og gestir þeirra eiga kost á til að njóta útiveru og hreyfingar. Það er ekki mikil umferð um stígana í Naustaborgum ef miðað er við Kjarnaskóg. En samt sem áður eru þarna stórgóðir stígar og aðstæður hingar bestu.

 

 

 

 

 Fyrir þremur árum var hafist handa við að endurheimta stærstu tjörn í landi Akureyrar, Hundatjörn í Naustaborgum.

Skurðum var lokað og stífla gerð. Vatnið hefur lagst að stíflunni og framkvæmdin lofar góðu. Þegar eru orðnar verulegar breytingar á svæðinu og votlendið hefur stækkað og gróðurfar er að breytast í átt til þess sem það var fyrir áratugum.

 

  

 

 Margar tegundir trjágróðurs eru á svæðinu og á þessari mynd sést hvar stígur hefur verið gerður í gegnum aspareit.

 

 

 

  

 

 Útsýnið til norðurs og sér norður til þéttbýlisins á Akureyri. Það skemmtilega við Naustaborgir er að skógi hefur verið plantað en samt sem áður hafa verið skilin eftir svæði inn á milli þar sem náttúran eins og hún var fyrir skógrækt. Krækiberjalyng, klettar með jökulrispum og ýmis móagróður er inn á milli skógarreitanna.

 

 

  

 

 

 Einn elsti stígurinn.

 Liggur alla leið suður í Kjarnaskóg um Hamraland. Þá leið er sérlega gaman að ganga en víða liggur hún undir klettum og fjölbreytilegu landslagi.

 

 

  

 

 Útsýni til suðurs í átt að Kjarnaskógi. Sérlega fallegt landslag og skólsælt til gönguferða. Reiðleið liggur á kafla rétt við göngustígana og á smá hluta er notast við sama stíg fyrir hesta og fólk. Þar þarf að vinna í að aðskilja göngu og reiðleið með einhverjum ráðum.

Þar var komið til móts við hestmenn sem vildu halda þeim möguleika að reiðleið væri á þessum stað þó ekki væri gert ráð fyrir slíku í skipulagi.

 

  

 

Fuglaskoðunarhús í Naustaborgum. Eitt af fjórum á Akureyri. Fjölbreytt fuglalíf er í Naustaborgum og þar ber mest á mófugli og öndum. Þó voru endur lítt sjáanlegar í dag vegna þurrka. Tjörnin góða er vatnslítil eins og áður sagði en það á við um margar tjarnir á Norðurlandi síðustu vikurnar.

 

 

 

  

 

Fífurbreiður í tjarnarstæði Hundatjarnar sýna svo ekki verður um villst að endurheimt votlendis er að ganga eftir.

Þetta svæði hefur gjörbreyst á þessum þremur árum frá því þessi vinna hófst í tengslum við norrræna verkefnið Countdown 2010 sem lauk í vor sem leið.