Áhugaverð atburðarás.

Svæðið frá Bárðarbungu og Kverkfjöllum í suðri um Öskju og Upptyppinga norður í Herðubreið hefur verið líflegt undanfarna mánuði.

Það sem er sérstakt við þetta er að þetta eru í reynd tvö kerfi á hreyfingu samtímis. Kverkfjallareinin er sú austari þar sem nyrsti hlutinn á hreyfingu er Hlaupfell og svo  sú vestari, Dyngjuháls - Öskjureinin sem hefur líka verið að minna á sig með skjáftahrinum í Herðubreiðartöglum, Dyngjuhálsi, stökum skjálftum í Öskju... mest norðan við Öskjuvatn, og svo núna í drottningunni sjálfri Herðubreið.

Hvað af þessu er tengt kvikuhreyfingu er ekki gott að segja en jarðfræðingar telja næsta víst að hreyfingin á eystra svæðinu sé vegna kviku á miklu dýpi sem þó hefur grynnst um meira en helming. Þeir hafa minna tjáð sig um vestara svæðið en þar er meiri saga um eldgos, bæði í Dyngjuhálsi, Öskju og svo alveg norður á Mývatnsöræfi.

Það væri ekki ótrúlegt að þarna kæmi upp eldgos á næstunni. Á næstunni gæti þess vegna þýtt margir mánuðir en aðdragandi gosa á þessu svæði er óskrifað blað. Síðasta gos þarna varð 1961 í Vikraborgum í Öskjuopi. Þar áður voru hrinur smærri gosa á þriðja áratug síðustu aldar, þá runnum m.a Bátshraun, Mývetningahraun og Eyjan í Öskjuvatni varð til.

Síðustu risaatburðir þarna voru 1874-1875 þegar Víti gaus risastóru sprengigosi og Öskjuvatn varð til á næstu áratugum þegar botn öskjunnar féll niður.

Þarna gætum við séð túristavænt flæðigos á rólegu nótunum en þarna hafa líka orðið með stærstu atburðum núntímajarðsögu landins.

 Það hafa því örugglega allir varann á  þegar þetta svæði titrar.

Skjálfti að stærð 3,5 við Herðubreið