Jólasveinarnir þjófar og Grýla gamla mannæta.

Ja hérna, þvílíkur skandall, Stubbarinir samkynhneigðir. Þetta verður að banna og ég vona að hinum viðkvæmu Pólverjum verði hlíft við þessum ófögnuði. Mig minnir að Andrés vinur minn önd hafi verði bannaður í Svíþjóð um árið fyrir ofbeldisfulla hegðun, en það er kannski búið að vera í dag.

Í framhaldi af þessu er full ástæða til að taka barnagælurnar Íslensku til gaumgæfilegrar athugunar og ástæða til að fá embættismenn til að rannsaka ýmislegt. Fyrst detta mér í hug jólasveinarnir sem lentu að vísu upp á kant við kirkjuna um tíma en það gleymdist fljótt. Ef ég man rétt eru þeir allir með tölu rummungsþjófar og hrekkjusvín nema kannski Stúfur sem er fremur rólegur í tíðinni. Þá er móðir þeirra mannæta með fleiru en ef til vill þarf ekki að skoða hana nánar því hún er víst dauð eins og segir í vísunni. En líklega er rétt að afmá nafn hennar úr sögubókunum því skaðræði var hún meðan hún lifði.

Jólakötturinn er einnig stórhættulegt kvikindi og rétt að fjarlægja hann enda er hann lítt matvandur og lifir helst á þeim sem eru svo óheppnir að fá ekki nýjar flíkur fyrir jólin. Ef ekki gengur að fá nafn hans afmáð er ef til vill ástæða til að kalla til hinn Pólska umboðsmann barna, hann kippti þessu í liðinn á andartaki.

Og svo eru það öll ævintýrin sem ég var mataður á sem barn og tel mig stórskaðan. Þar eru framlega Mjallhvít og dvergarnir sjö, Rauðhetta og Þyrirós. Fádæma mannvonska er þar meginefni og ég trúi ekki að það verði látið viðgangast að þessar bókmenntir verði á bókasöfnum landsins.

En að öllu gamni slepptu.... er þetta ekki fráleit frétt og ég trúi því að pólski embættismaðurinn sé að gera að gamni sínu.

Pólsk yfirvöld rannsaka hvort Stubbarnir séu samkynhneigðir